Crònica legislativa d'Astúries (Others)

Autor:José Manuel Pérez
Càrrec:profesor titular de Derechu Alministrativu. Universidà d'Uviéu.
Pàgines:196-199
 
CONTENIDO

Page 196

Primer y segundu semestre de 20121

Alministración del Principáu d’Asturies: Estructura Alministrativa.

El 25 de marzu del añu 2012 celebráronse les elecciones a la Xunta Xeneral del Principáu d’Asturies, col resultáu del trunfu de la FSA-PSOE y de un parlamentu integráu por cinco grupos políticos que se ven obligaos a axustar la formación d’un gobiernu que pueda gociar de cierta estabilidá, contribuyendo a superar la situación de paralís na que s’atopaba la Comunidá Autónoma asturiana. El 27 d’abril de 2012 celebróse la sesión constitutiva de la Xunta Xeneral del Principáu d'Asturies que concluyó cola formación d’un gobiernu en minoría de la FSA-PSOE, col sofitu parlamentariu d’IX y UPyD.

Unu de los primeros pasos del Gobiernu socialista foi dar en aprobar la estructura de la nueva Alministración, ensin cambeos nominales, nin cuantitativos importantes, col fin d’empecipiar cuanto antes l’acción de gobiernu. Asina, hai que facer referencia al Decretu 4/2012, de 26 de mayu (BOPA 122, de 28 de mayu de 2012), del Presidente del Principáu d’Asturies, de reestructuración de les Conseyeríes qu’integren l’Alministración de la Comunidá Autónoma. Dende’l puntu de vista de la llingua asturiana, la Conseyería relevante ye la d’Educación, Cultura y Deporte (artículu 5.2), a la qu’atribúi específicamente’l desenvolvimientu de la política llingüística.

En segundu llugar, hai que citar el Decretu 74/2012, de 14 de xunu (BOPA 138, de 15 de xunu de 2012), pol que s’establez la estructura orgánica básica de la Conseyería d’Educación, Cultura y Deporte. Ye nesta Conseyería onde s’alluguen los órganos básicos na xestión de la política lingüística. Per una parte, la Dirección Xeneral de Política Llingüística a la que-y correspuende la planificación, execución, coordinación con otres alministraciones, control y evaluación de los programes necesarios pal desenvolvimientu d’una política llingüística que garantice y normalice socialmente l’usu del asturianu y del gallego-asturianu, y amás la so protección, promoción y espardimientu, según lo previsto na Llei del Principáu d’Asturies 1/98, de 23 de marzu, d’usu y promoción del bable/asturianu (artículu 13.1). Y, per otra parte, el Serviciu de Política Llingüística que va desenvolver les funciones relatives a la execución, coordinación con otres alministraciones, control y evaluación de los programes necesarios pal desenvolvimientu d’una política llingüística que garantice y normalice socialmente l’usu del asturianu y del gallego-asturianu, y amás les necesaries pa la so protección, promoción y espardimientu. Coles

Page 197

mesmes, va asumir les funciones d’órganu de traducción oficial previstes na Llei del Principáu d’Asturies 1/98, de 23 de marzu, d’usu y promoción del bable/asturianu (artículu 14). Amás, ye la Conseyería al traviés de la cual l’Academia de la Llingua Asturiana rellaciónase cola Comunidá Autónoma (artículu 1.4).

Una postrera midida de calter alministrativu afecta a la xestión del profesoráu d’asturianu y gallego-asturianu, y foi adoptada pol gobiernu precedente de Foro Asturies. Trátase de la Resolución de 20 de marzu de 2012 (BOPA 91, de 20 d’abril de 2012), pola que se crea’l ficheru de datos de calter personal "Capacitación en bable/asturianu y en gellego/asturianu".

Educación: la eliminación de la ratio mínima pa cursar llingua asturiana.

Pola so importancia en relación coles meyores na enseñanza del asturianu, ye necesariu referise al fechu de que la Sala de lo Contencioso-Alministrativo, Estaya Cuarta, del Tribunal Supremu, con fecha 24 d’abril del 2012 (RJ\2012\6230), tornó’l recursu de casación interpuestu pola Conseyería d’Educación contra la sentencia del Tribunal Superior de Xusticia d’Asturies, de 17 de setiembre de 2010, qu’estimaba la demanda interpuesta por la confederación sindical CCOO contra la Resolución del 16 de mayu del 2008 de la Conseyería pola que s’establez la ufierta y les condiciones pa la elección de materies optatives y materies opcionales pa la Educación Secundaria Obligatoria (ESO). El Supremu torna’l recursu de casación interpuestu pol Lletráu del Serviciu Xurídicu d’Asturies y confirma la nulidá del artículu 5.1 de la Resolución impugnada, qu’establecía un númberu mínimu d’ocho alumnos pa formar un grupu na asignatura de Llingua Asturiana en Secundaria.

Al igual que yá fixera antes el Tribunal Superior de Xusticia d’Asturies, la Sentencia del Tribunal Supremu da la razón a una reclamación histórica, la de garantizar el derechu a cursar l’asignatura d’asturianu de forma voluntaria ensin depender del númberu d’alumnos que lu solicite. El Altu Tribunal entiende que nun hai llugar pal recursu de casación y confirma la sentencia del Tribunal Superior de Xusticia d’Asturies, que considera que l’Alministración, al establecer un númberu mínimu pa formar un grupu, se deslliga de la obligación que-y impón l’artículu 10.1 de la Llei 1/1998 d’Usu y Promoción del Bable/Asturianu de garantizar el so enseñu en tolos niveles y graos, con independencia del númberu d’alumnos qu’opten.

Toponimia.

Siguiendo col procesu de recuperación de la toponimia asturiana tradicional, l’añu 2012 foi, ensin dulda, el más escasu en producción, debíu quiciabes a la inestabilidá gubernamental. Solamente aprobóse el Decretu 181/2012, de 8 de agostu (BOPA 190, de 16 d’agostu de 2012), pol que se determinen los topónimos oficiales del conceyu de Ibias.

Promoción y normalización del usu social del asturianu y del gallego-asturianu.

Les accciones y midíes pa impulsar el procesu de normalización social del asturianu y el gallego-asturianu recóyense nes siguientes resoluciones:

- Resolución de 23 d’abril de 2012, de la Conseyería de Cultura y Deporte (BOPA 99, de 30 d’abril de 2012), pola que s’aprueba’l primer cambéu de les bases reguladores de la concesión de

Page 198

subvenciones pa la normalización social del asturianu, en réxime de concurrencia competitiva, aprobaes por aciu de la Resolución de 30 d’abril de 2009.

- Resolución de 9 de mayu de 2012, de la Conseyería de Cultura y Deporte (BOPA 118, de 23 de mayu de 2012), pola que s’autoriza el gastu y s’aprueba la convocatoria de subvenciones pa la normalización social de la lliteratura n’asturianu y en gallego-asturianu nel ámbitu editorial, en réxime de concurrencia competitiva.

L’oxetu d’esta llinia d’actuación ye la concesión de subvenciones pa la promoción del llibru n’asturianu y en gallego-asturianu per aciu d’ayudes económiques a empreses editoriales pa la edición demientres l’añu 2012 de llibros orixinales o traducíos d’otres llingües (con una tirada mínima de 500 exemplares y con una estensión que nun sía inferior a 50 páxines, sacántenes en llibros infantiles y xuveniles) y que pol so interés y calidá contribuyan a la normalización social de la llingua y al arriquecimientu de la nuestra cultura, permitiendo la constitución d’un fondu bibliográficu en llingua asturiana. Nes obres traducíes l’ayuda va estendese a los gastos derivaos de la traducción.

- Resolución de 18 de mayu de 2012, de la Conseyería de Cultura y Deporte (BOPA 119, de 24 de mayu de 2012), pola que s’autoriza el gastu y s’aprueba la convocatoria conxunta de subvenciones pa la normalización social del asturianu y, nel so ámbitu, del gallego-asturianu, en réxime de concurrencia competitiva.

Les subvenciones tienen por oxetu les actividaes d’asociaciones y otres entidaes sin propósitu d’interés económicu pa la normalización social del asturianu y, nel so ámbitu, del gallego-asturianu (Llinia 3); les actividaes d’empreses privaes pa la normalización social del asturianu y, nel so ámbitu, del gallego-asturianu (Llinia 4); la promoción d’actividaes cinematográfiques y de videu n’asturianu o gallego-asturianu (Llinia 5); la promoción de la música n’asturianu y en gallego-asturianu (Llinia 6); y les actividaes de medios de comunicación pa la normalización social del asturianu y, nel so ámbitu, del gallego-asturianu (Llinia 7).

La resolución foi oxetu de rectificación d’errores nel BOPA 213, de 13 de setiembre de 2012.

- Resolución de 1 de xunu de 2012, de la Conseyería d’Educación, Cultura y Deporte (BOPA 138, de 15 de xunu de 2012), pola que se convoquen los premios "Xosefa Xovellanos" de novela, "Xuan M.ª Acebal" de poesía, "Máximo Fuertes Acevedo" de ensayu, "María Josefa Canellada" de lliteratura infantil/xuvenil y "Alfonso Iglesias" de cómic en llingua asturiana.

- Resolución de 26 de xunu de 2012, de la Conseyería d’Educación, Cultura y Deporte (BOPA 151, de 30 de xunu de 2012), pola que s’aprueba la convocatoria conxunta de subvenciones a les Entidaes Locales, nel ámbitu de la Conseyería d’Educación, Cultura y Deporte, en réxime de concurrencia competitiva, mientres l’exerciciu 2012. La llinia 1 tien por oxetu’l desenvolvimientu de proyectos y actividaes empuestes a la normalización del usu social del asturianu y, nel so ámbitu, del gallego-asturianu. Nun s’inclúin na presente convocatoria los gastos derivaos del funcionamientu de los Servicios de Normalización Llingüística de la Entidaes Locales.

Page 199

- Resolución de 20 de xunetu de 2012, de la Conseyería d’Educación, Cultura y Deporte (BOPA 183, de 7 d’agostu de 2012), pola que se conceden y deniegan subvenciones pa la promoción de la música n’asturianu o gallego-asturianu.

- Resolución de 4 de setiembre de 2012, de la Conseyería d’Educación, Cultura y Deporte (BOPA 213, de 13 de setiembre de 2012), pola que se modifica la Resolución de 9 de mayu de 2012 pola que s’autoriza’l gastu y s’aprueba la convocatoria de subvenciones pa la normalización social de la lliteratura n’asturianu y en gallego-asturianu nel ámbitu editorial, en réxime de concurrencia competitiva.

- Resolución de 4 de setiembre de 2012, de la Conseyería d’Educación, Cultura y Deporte Deporte (BOPA 213, de 13 de setiembre de 2012), pola que se modifica la Resolución de 18 de mayu de 2012 pola que s’autoriza’l gastu y s’aprueba la convocatoria conxunta de subvenciones pa la normalización social del asturianu y, nel so ámbitu, del gallego-asturianu, en réxime de concurrencia competitiva.

- Resolución de 9 d’ochobre de 2012, de la Conseyería d’Educación, Cultura y Deporte (BOPA 239, de 15 d’ochobre de 2012), pola que se conceden y denieguen subvenciones pa la promoción del llibru n’asturianu o gallego-asturianu.

- Resolución de 9 d’ochobre de 2012, de la Conseyería d’Educación, Cultura y Deporte (BOPA 239, de 15 d’ochobre de 2012), pola que se conceden y denieguen subvenciones pa la promoción de les actividaes d’asociaciones y otres entidaes ensin ánimu d’arriquecimientu pa la normalización social del asturianu y del gallego-asturianu.

- Resolución de 11 d’ochobre de 2012, de la Consejería d’Educación, Cultura y Deporte (BOPA 247, de 24 d’ochobre de 2012), pola que s’modifica la Resolución de 26 de xunu de 2012 pola que s’aprueba la convocatoria conxunta de subvenciones a les entidaes locales, nel ámbitu de la Conseyería d’Educación, Cultura y Deporte, en réxime de concurrencia competitiva, mientres l’exerciciu 2012.

- Resolución de 15 d’ochobre de 2012, de la Conseyería d’Educación, Cultura y Deporte (BOPA 244, de 20 d’ochobre de 2012), por la que se conceden y denieguen subvenciones pa la promoción de les actividaes de medios de comunicación pa la normalización social del asturianu y del gallego-asturianu.

- Resolución de 13 de payares de 2012, de la Conseyería d’Educación, Cultura y Deporte (BOPA 271, de 22 de payares de 2012), pola que se conceden y denieguen subvenciones a Entidaes Locales pa la normalización social del asturianu y del gallego-asturianu.

[1] Por cuenta de la poca cantidá de datos apaecíos nel primer semestre, esta crónica toma tol añu 2012.